Tabledi cysgu a thawelyddion ysgafn

Mae’r adran hon yn egluro ar gyfer beth y defnyddir tabledi cysgu a thawelyddion ysgafn, sut mae’r feddyginiaeth yn gweithio, sgil-effeithiau posibl a gwybodaeth am ddiddyfnu.

Read this page in English (Saesneg)

Effeithiau diddyfnu bensodiasepinau

Mae’r dudalen hon yn cwmpasu’r canlynol:

A all bensodiasepinau achosi problemau diddyfnu?

Fel arfer ni fyddwch yn cael unrhyw broblemau diddyfnu gyda bensodiasepinau os ydych yn gwneud y canlynol:

eu cymryd yn achlysurol, fel dos untro
yn dilyn argymhellion eich meddyg ar sut i’w cymryd

Fodd bynnag, os byddwch yn cymryd bensodiasepinau yn rheolaidd ac am amser hir, efallai y byddwch yn dod yn ddibynnol arnyn nhw. Gallai hyn olygu cael symptomau diddyfnu corfforol os byddwch yn stopio neu’n lleihau eich dos, neu efallai y byddwch yn teimlo na allwch ymdopi â’ch bywyd o ddydd i ddydd os na fyddwch yn eu cymryd.

Beth yw symptomau diddyfnu bensodiasepinau?

Os ydych yn cael problemau diddyfnu o bensodiasepinau, efallai y bydd gennych rai o’r symptomau canlynol:

crampiau yn yr abdomen
agoraffobia (ofn sefyllfaoedd sy’n teimlo’n anodd dianc oddi wrthynt)
gorbryder, gan gynnwys symptomau corfforol fel tensiwn yn y cyhyrau, brest dynn, curiad calon cyflym, chwysu, crynu neu ysgwyd
golwg aneglur
problemau canolbwyntio
pendro
poen yn yr wyneb a’r gwddf
cur pen
mwy o sensitifrwydd i oleuni, sŵn, cyffyrddiad ac arogl
colli diddordeb mewn rhyw
colli archwaeth
iselder ysgafn neu ganolig
cyfog (teimlo’n sâl)
hunllefau
pyliau o banig
aflonyddwch
problemau cysgu
llygaid dolurus
tafod dolurus a blas metelaidd
tinitws (canu yn eich clustiau)
pinnau bach yn y dwylo a’r traed (pinnau a nodwyddau)
coesau simsan
chwydu (bod yn sâl)
colli pwysau

Gall rhai pobl hefyd wynebu symptomau diddyfnu mwy difrifol o bensodiasepinau. Gall y rhain gynnwys:

teimladau llosgi yn y croen
dryswch
rhithdybiau (credoau cryf nad yw pobl eraill yn eu rhannu)
dadbersonoli (teimlo ar wahân i’ch amgylchedd)
dadwireddu (teimlo allan o gysylltiad â realiti)
rhithweledigaethau
colli cof
cyhyrau’n gwingo
paranoia
trawiadau (ffitiau).

Os byddwch yn rhoi’r gorau i gymryd bensodiasepinau yn sydyn, gall hyn achosi symptomau diddyfnu difrifol. Mae’r rhain yn cynnwys:

dryswch
seicosis
trawiadau
casgliad o symptomau gan gynnwys curiad calon cyflym, chwysu, pwysedd gwaed uchel, cryndod (ysgwyd), rhithweledigaethau ac ymddygiad cynhyrfus.

Yn y diwedd, diddyfnodd fy meddyg fi oddi arno, yn araf iawn, dros gyfnod o fisoedd. Roedd hi’n anodd, ond roeddwn i’n gwybod mai dyna’r peth iawn i’w wneud.

Pryd ydw i’n debygol o gael symptomau diddyfnu o bensodiasepinau?

Gall symptomau diddyfnu ddechrau sawl awr ar ôl i chi roi’r gorau i gymryd bensodiasepin byrweithredol. Fodd bynnag, gallant ddechrau hyd at dair wythnos ar ôl i chi roi’r gorau i gymryd bensodiasepin hir-weithredol. Mae hyn oherwydd y gall bensodiasepinau hir-weithredol aros yn actif yn eich system am ychydig ar ôl i chi roi’r gorau i’w cymryd.

Po hiraf y byddwch yn cymryd bensodiasepinau, y mwyaf tebygol yw hi y byddwch yn ei chael hi’n anodd rhoi’r gorau iddynt a mwyaf fydd eich risg o symptomau diddyfnu. Gall fod yn arbennig o anodd rhoi’r gorau i gymryd bensodiasepinau byrweithredol os ydych wedi eu cymryd ers amser maith.

Gweler ein tudalen ar gymharu bensodiasepinau am ragor o wybodaeth am bensodiasepinau byrweithredol a hir-weithredol.

Sut alla i roi’r gorau i gymryd bensodiasepinau yn ddiogel?

Os yw’n bosibl, dylech leihau eich dos yn raddol pan fyddwch yn rhoi’r gorau i gymryd bensodiasepinau. Mae hyn yn lleihau’r risg o gael symptomau diddyfnu.

Gall eich meddyg roi cyngor mwy penodol ar sut i roi’r gorau i gymryd eich meddyginiaeth yn ddiogel. Efallai y bydd yn ddefnyddiol i chi hefyd siarad ag eraill am ddiddyfnu. Er enghraifft, gall hyn fod mewn grŵp cymorth lleol neu ar-lein, neu gymorth gan ffrindiau a theulu.

Gweler ein tudalennau ar roi’r gorau i gymryd meddyginiaeth seiciatrig am ragor o wybodaeth, gan gynnwys gwahanol ffyrdd o ddod o hyd i gymorth.

Diddyfnu cyffuriau gwrth-iselder a bensodiasepin

Mae rhai pobl yn teimlo iselder ar ôl rhoi’r gorau i gymryd bensodiasepinau. Os byddwch yn wynebu hyn, efallai y bydd eich meddyg yn cynnig cyffuriau gwrth-iselder i chi i’ch helpu i ymdrin â symptomau iselder. Ond, mae rhywfaint o ymchwil yn awgrymu nad yw cyffuriau gwrth-iselder sydd ag atalydd aildderbyn serotonin dethol (SSRI) yn effeithiol ar gyfer trin iselder sy’n digwydd ar ôl i unigolyn roi’r gorau i gymryd bensodiasepinau.

Gweler ein tudalennau ar gyffuriau gwrth-iselder am ragor o wybodaeth am y feddyginiaeth hon, gan gynnwys y manteision a’r sgil-effeithiau posibl. Gallwch hefyd drafod unrhyw gwestiynau neu bryderon sydd gennych am hyn â’ch meddyg.

Pump awgrym ar gyfer rhoi’r gorau i’ch meddyginiaeth

Gwyliwch Katherine o’n tîm gwybodaeth yn rhoi ei phump awgrym gwych ar gyfer rhoi’r gorau i’ch meddyginiaeth yn ddiogel.

Oedd y dudalen hon yn ddefnyddiol? Yes No Tell us more Tell us more

Tell us more

Why did you visit this page? *

For my own mental health
For someone else’s mental health
Academic/educational/professional reason
Other reason

What do you want to tell us about?

Praise – things we do well
Criticism – things we could do better
Errors, mistakes or broken links

Please give us your feedback:

Note:

Please don’t include personal details like your name or email address. If you do, data protection law means we’ll have to delete your comments.
Unfortunately we can’t reply to this. If you want a response from us, see our Contact us page.
If you are in crisis right now and want to talk to someone urgently then you could call Samaritans on 116 123 (freephone). Our pages on crisis services have more options.