Sut mae llinell wybodaeth Mind wedi helpu fi a fy mab

Mae llinell wybodaeth a gwefan Mind wedi fy helpu i'n fawr.

Dechreuodd fy mhroblemau iechyd meddwl pan roedd gen i iselder ar ôl geni fy ail fab, ac yn ystod ac wedi fy nhrydydd beichiogrwydd. Effeithiodd y ddau arnaf mewn ffyrdd gwahanol. Er hynny, rydw i wedi bod yn byw gydag effeithiau'r cyfnodau hyn o iselder byth ers hynny. Bues i hefyd mewn perthynas lle gefais fy ngham-drin, ac mae wedi cymryd blynyddoedd i ddod dros hynny.

Mae fy mab, sydd yn ei arddegau, hefyd yn dioddef ag iselder a gorbyder ofnadwy. Yn aml mae'n cael pyliau o banig ac mae hyd yn oed wedi ceisio cyflawni hunanladdiad. Dydy hi ddim bob amser yn bosib i fi ffonio'r meddyg teulu neu ei gwnselydd CAMHS (Gwasanaeth Iechyd Meddwl Plant a Phobl Ifanc). Dydyn nhw ddim bob amser ar ochr arall y ffôn felly mae'n dda cael gwybod bod rhywun o Mind yno. Rwy'n galw'r llinell wybodaeth yn aml i'r ddau ohonom ni, ac mae'n meddwl cymaint i gael rhywun y gallaf siarad â nhw heb iddyn nhw fy marnu i. Mae'n golygu cymaint i gael rhywun i siarad â nhw heb gael fy marnu. Weithiau, rwy'n galw i gael rhywun i gadarnhau fy mod i'n dweud y peth cywir ac yn cefnogi fy mab yn y ffordd gywir. Pan mae'n dweud nad yw eisiau byw rhagor i wneud i'r boen ddiflannu, rwy'n poeni y byddaf yn dweud rhywbeth fyddai'n gwneud pethau'n waeth.

Mae Mind wedi rhoi cyngor ymarferol i mi ar bethau y gallaf wneud i helpu, fel graddio ei byliau o banig o un i bump fel ein bod ni'n dau yn gwybod pa mor wael mae'n teimlo. Gallaf basio'r cyngor a'r wybodaeth oddi wrth Mind ymlaen at fy mab.

Rydw i hefyd wedi defnyddio llinell wybodaeth a gwefan Mind fy hun i ymdopi gyda fy iselder. Yn amlwg, mae poeni am fy mab yn cael effaith ar y ffordd rydw i’n teimlo. Rwy’n gwybod na allaf adael fy iechyd meddwl i waethygu eto, gan fy mod i’n gorfod bod yno iddo beth bynnag ddaw. Os nad ydw i’n iach, dydw i ddim yn gallu gwneud hynny, felly rwy’n ddiolchgar bod y wefan a’r llinell wybodaeth yno i fi gael dibynnu arnynt.

Rwy’n credu ei fod mor bwysig bod mamau yn cael cefnogaeth iechyd meddwl, fel eu bod yn gallu cefnogi eu plant. Pe bawn i ond yn gwybod am y llinell wybodaeth ynghynt! Efallai na fyddai pethau wedi bod mor anodd pe bawn i wedi cael cefnogaeth ynghynt.