Cyn i mi gofrestru ar gyfer hunangymorth gyda chefnogaeth, roeddwn i’n teimlo fy mod i’n boddi

Mae sawl peth wedi digwydd yn fy mywyd ers 2020. Fe wnes i golli fy mam i Covid ac yna bu farw fy nain yn fuan wedyn. Ychydig fisoedd yn ddiweddarach, cafodd fy nheulu a minnau ein gorfodi i symud i lety brys i ddianc o’n sefyllfa fyw ofnadwy. Bu bron i mi â cholli fy mab. Roedd yn teimlo fel bod un peth drwg ar ôl y llall yn digwydd, a doeddwn i ddim fel pe bawn i’n gallu cael fy hun allan o’r cylch.

Rheoli eich teimladau

Yn y diwedd fe es i weld fy meddyg teulu gan fy mod i wedi bod yn cael rhai problemau parhaus gyda fy iechyd corfforol, ac fe wnaethon nhw fy nghyfeirio at Mind i gael cymorth gyda fy iechyd meddwl.

Cefais fy nghofrestru ar gyfer hunangymorth â chefnogaeth, a dyna pryd y dechreuais i weithio gyda fy ymarferydd Stephanie o Mind Gogledd Ddwyrain Cymru.

Rhaglen un-i-un dan arweiniad sy’n para am chwe wythnos yw hunangymorth â chefnogaeth.  Ac mae o am ddim. Mae Mind yn rhoi’r deunyddiau i chi ddeall a rheoli eich teimladau, ac mae eu hymarferwyr yn defnyddio sgiliau cwnsela ac offer Therapi Gwybyddol Ymddygiadol yn y sesiynau. Cyn i mi gael gwasanaeth hunangymorth gyda chefnogaeth Mind, roeddwn i’n teimlo fy mod i’n boddi.

Yn wreiddiol, roedd fy symptomau’n cynnwys popeth o alar i orbryder ac iselder – ond ar ôl siarad â Stephanie roedd yn ymddangos bod fy holl broblemau’n gysylltiedig â’r menopos, a’r effaith roedd hyn yn ei chael ar fy iechyd meddwl.

Cymerodd dipyn o amser i ddechrau arni ond roedd Stephanie yn hyfryd, a bu'n gweithio gyda mi am chwe wythnos. Roedd ein cyfarfodydd dros y ffôn, ac fe anfonodd hi lyfrynnau ataf i’w darllen ac ymarferion i mi roi cynnig arnyn nhw gartref.

“Rhoddodd Stephen ymarferion anadlu ac ymlacio amrywiol i mi er mwyn helpu i fy nhawelu mewn cyfnodau o orbryder.”

Roedd un ymarfer yn ymwneud â dyddiadur lle roeddwn i’n gallu cofnodi’r holl faterion roeddwn i wedi bod yn cael trafferth ymdopi â nhw, yn ogystal â ffyrdd y gallwn i ddelio â nhw. Roedd hyn yn cynnwys rhestr o sbardunau - y gwnaethom eu hadolygu gyda’n gilydd yr wythnos ganlynol - a siarad amdanynt mewn ffordd oedd yn fy ngalluogi i feddwl pam roedd y sbardunau hyn yn effeithio arna’i, a theimlo fy mod yn gallu eu deall yn well.

Rhoddodd Stephanie ymarferion anadlu ac ymlacio amrywiol i mi er mwyn helpu i fy nhawelu mewn cyfnodau o orbryder a phoeni. Awgrymodd hefyd i mi ddefnyddio dulliau tynnu sylw a chanolbwyntio ar rywbeth arall am eiliad – cyngor cadarnhaol a defnyddiol rydw i’n dal i’w ddefnyddio heddiw.

Mae fy iechyd meddwl yn well nag yr oedd erbyn hyn. Dydy o ddim yn 100%, a dydw i ddim yn meddwl y bydd o byth. Rydw i’n dal i brofi galar ar ôl colli mam ac rydw i’n dal i’w cholli, ond fe wnaeth y gwasanaeth fy helpu drwy gyfnod mor anodd pan oedd yn teimlo bod popeth yn fy nharo ar unwaith.

Roedd yn bwysig i mi ddeall bod fy symptomau o orbryder, iselder a galar i gyd yn gysylltiedig â’r menopos. Nid dim ond symptomau arferol y menopos fel chwysu yn y nos. Ond y teimlad llethol sy’n cael ei achosi gan bob dim – methu cysgu, hunllefau, a phoeni’n ddi-baid. Mae gen i apwyntiad gyda’r meddygon yn fuan i drafod fy symptomau menopos. Fe wnaeth Stephanie fy nghynghori i ysgrifennu popeth rydw i eisiau siarad amdano ar bapur, gan fy mod i’n gwybod y bydd fy meddwl yn mynd yn wag yn yr apwyntiad.

Peidio â chael eich beirniadu

Byddwn yn argymell yn gryf bod pobl eraill yn rhoi cynnig ar hunangymorth â chefnogaeth. Mae siarad â rhywun nad ydych chi’n ei adnabod yn barod yn ddefnyddiol iawn weithiau - mae’n llawer haws bod yn agored ac yn onest gyda dieithryn oherwydd dydyn nhw ddim yn mynd i’ch beirniadu chi. Maen nhw’n mynd i ddweud wrthych chi sut y mae hi a rhoi cyngor diduedd i chi. A fyddwch chi ddim yn ffraeo gyda nhw os oes adegau pan fyddwch chi’n teimlo’n flin neu’n ypset!