Clywed lleisiau

Mae'r dudalen hon yn egluro sut beth yw clywed lleisiau, ble i fynd am help os oes ei angen arnoch, a beth all pobl eraill ei wneud i gefnogi rhywun sy'n cael trafferth gyda chlywed lleisiau.

Read this page in English (Saesneg)

Profiadau o glywed lleisiau

Mae eich profiad o fyw gyda lleisiau yn unigryw i chi. Ond mae'r dudalen hon yn trafod sefyllfaoedd, cwestiynau a theimladau y gallent fod yn gyfarwydd i chi.

Pa fath o leisiau mae pobl yn eu clywed?

Efallai y byddwn yn clywed lleisiau mewn sawl ffordd wahanol ac efallai y byddant yn newid dros amser. Dyma rai o'r ffyrdd y gallai gwahanol bobl gael profiad o glywed lleisiau.

O ble maen nhw’n dod?

Efallai y byddwch yn:

Profi’r lleisiau fel rhai sy'n dod o du fewn i’ch pen
Teimlo bod lleisiau'n dod o'r tu allan ac yn cael eu clywed trwy'ch clustiau fel synau eraill
Gwrando ar y lleisiau fel petaen nhw wrth ymyl eich clust
Clywed y lleisiau'n dod o wrthrych neu anifail
Teimlo fel pe baech chi'n clywed meddyliau pobl eraill, neu fel petai pobl eraill yn gallu clywed eich meddyliau

Pryd fyddaf yn eu clywed?

Efallai y byddwch yn:

Clywed eich enw pan nad oes unrhyw un gyda chi
Gweld neu glywed pethau wrth i chi gwympo i gysgu
Clywed lleisiau pan fyddwch yn teimlo dan straen neu'n ofidus

Mae'n digwydd yn aml pan fyddaf yn y gwely ac yn methu cysgu, ond mae wedi digwydd yn ystod y dydd hefyd.

Beth allan nhw ei ddweud?

Efallai y byddwch yn:

Profi lleisiau cas neu fygythiol sy'n dweud wrthych am wneud pethau peryglus, neu sy’n ceisio eich rheoli
Clywed llais sy'n teimlo'n gyfeillgar ond sy'n eich annog i wneud pethau nad ydynt efallai'n dda i chi
Clywed llais cefnogol, caredig neu lais sy'n eich helpu
Clywed llawer o leisiau'n siarad amdanoch neu'n dadlau â'i gilydd
Clywed llais sy’n disgrifio'r hyn rydych chi'n ei wneud wrth i chi ei wneud
Clywed lleisiau'n siarad am bethau brawychus neu ofidus, fel dweud wrthych chi y bydd rhywbeth gwael yn digwydd i chi neu rywun rydych chi'n ei garu
Clywed lleisiau sy'n gwneud hwyl amdanoch neu'n eich beirniadu

Sut maen nhw'n swnio?

Efallai y byddwch yn:

Clywed lleisiau gyda gwahanol gyflymder neu lefel sain
Clywed lleisiau pobl rydych chi'n eu hadnabod, fel ffrindiau, aelodau o'r teulu neu bobl enwog
Clywed lleisiau dieithriaid

Gallwch chi hefyd:

Clywed synau eraill, fel synau anifeiliaid neu gerddoriaeth
Gweld, clywed neu arogli pethau na all eraill tra byddwch yn clywed lleisiau. Weithiau gelwir y rhain yn rhithweledigaethau synhwyraidd
Teimlo cynhesrwydd, poen, pwysau neu deimladau yn eich pen neu rannau eraill o'ch corff wrth glywed lleisiau
Profi lleisiau drwy weld dwylo yn arwyddo geiriau neu drwy weld symudiadau gwefusau. Efallai y byddwch yn fwy tebygol o brofi lleisiau fel hyn os ydych chi'n fyddar.

Dwi'n cofio clywed sibrwd maleisus yr oeddwn yn tybio oedd yn dod gan deithwyr eraill ar y trên... Roedd fel petai fy mod yn gallu clywed meddyliau pobl ac yn fy nghyflwr o baranoia, roedd y rhain bob amser yn faleisus ac yn feirniadol.

Eich perthynas â'ch lleisiau

Efallai bod gennych chi deimladau gwahanol am eich lleisiau ar wahanol adegau yn eich bywyd – neu hyd yn oed ar adegau gwahanol o'r dydd neu'r wythnos. Efallai byddwch chi:

Yn ystyried eich lleisiau'n gysurus, yn ddefnyddiol neu'n ddoniol
Yn ystyried bod eich lleisiau'n codi ofn, yn tynnu sylw neu'n peri gofid
Eisiau i'ch lleisiau stopio
Yn clywed rhai lleisiau rydych chi'n eu hoffi a lleisiau eraill sy'n achosi problemau i chi
Yn poeni mai chi yw'r unig un sy'n clywed lleisiau, neu nad oes neb arall yn clywed y mathau o leisiau rydych chi'n eu clywed

Yn aml, mae lleisiau yn broblem oherwydd eich perthynas â nhw, yn hytrach nag oherwydd eich bod chi'n eu clywed. Gall meddwl am eich perthynas â'ch lleisiau eich helpu i weithio allan beth (os o gwbl) rydych chi eisiau ei wneud amdanynt.

Gweler ein tudalennau ar ymdopi â chlywed lleisiau a thriniaethau i gael mwy o wybodaeth am y cymorth sydd ar gael.

Beth os ydw i'n hoffi fy lleisiau?

Mae rhai pobl yn gweld bod clywed lleisiau yn brofiad cadarnhaol. Efallai y bydd eich llais yn gyfeillgar ac yn gefnogol. Efallai y byddwch yn eu croesawu neu eu colli os byddant yn stopio. Efallai y byddan nhw'n gwneud i chi deimlo'n well neu'n eich annog yn ystod cyfnodau anodd.

A allaf ymddiried yn fy lleisiau?

Efallai y bydd yn anodd gweithio allan a yw'ch lleisiau eisiau'r gorau i chi ai peidio. Efallai eu bod yn teimlo'n gyfeillgar ond yn dweud wrthych am wneud pethau sy'n ei gwneud hi'n anodd i chi ofalu am eich hun. Neu’n eich stopio rhag gwneud yr hyn rydych chi eisiau ei wneud. Os yw'ch llais yn teimlo'n gysurus, gall fod yn anodd cydnabod ei fod yn dweud pethau ystrywus neu niweidiol.

Dysgu sut i reoli fy lleisiau

Gwyliwch Lilith yn siarad am sut wnaeth clywed lleisiau eu harwain at gynnau tân bwriadol. A sut wnaeth datgeliad y papur newydd lleol o’u problemau iechyd meddwl wneud iddynt wynebu eu problemau ar adeg anodd iawn.

Profiadau anodd o leisiau

Efallai y bydd eich profiad o glywed lleisiau yn anodd am ychydig o resymau:

Mae'n anoddach delio â fy lleisiau ar adegau penodol

Efallai mai dim ond ar adegau penodol o'r dydd y byddwch yn clywed lleisiau (er enghraifft, yn ystod amser bwyd). Neu hyd yn oed ar adegau penodol o'r flwyddyn (er enghraifft, ar ben-blwydd digwyddiad neu brofiad penodol).
Efallai y byddwch ond yn clywed lleisiau mewn rhai llefydd. Er enghraifft, efallai y byddwch chi'n clywed lleisiau pan fyddwch chi'n gadael y tŷ neu pan fyddwch chi'n mynd i le rydych chi'n ei gysylltu â straen neu drawma.
Efallai y gwelwch fod eich lleisiau'n uwch ac yn amlach pan fyddwch chi'n teimlo dan straen.

Gall hyn olygu eich bod yn osgoi rhai llefydd neu brofiadau – neu'n eu cael yn anodd iawn.

Dydw i ddim yn teimlo fy mod yn gallu rheoli fy llais

Efallai eich bod yn teimlo bod eich lleisiau'n eich rheoli neu'n eich atal rhag gwneud pethau yr hoffech chi eu gwneud.
Efallai y bydd eich lleisiau'n torri ar draws eich meddyliau a'i gwneud hi'n anodd iawn canolbwyntio neu gynnal sgwrs.
Efallai y bydd eich lleisiau yn dweud pethau sy'n sarhaus neu sy'n mynd yn groes i'ch gwerthoedd. Gall hyn deimlo'n gywilyddus, gan ei gwneud hi'n anoddach dweud wrth eraill am yr hyn rydych chi'n ei brofi.

Roedd cyfweliad gen i ... Gadewais y tŷ a dechreuodd y sibrwd, gan fynd yn uwch yn raddol nes i mi ffoi adref yn y pen draw yn chwysu ac yn llawn ofn.

Rwy'n teimlo dan fygythiad neu'n ofidus oherwydd fy lleisiau

Efallai y bydd eich lleisiau’n:

Angharedig i chi, yn eich beirniadu, ac yn amharchus
Dweud wrthych am wneud pethau sy'n anghywir
Mynnu eich bod yn brifo'ch hun

Mae'r profiadau hyn yn debygol o wneud i chi deimlo'n ofidus, yn ofnus neu'n ddig. Efallai eich bod yn teimlo eich bod yn haeddu cael eich gweiddi arnoch, neu ei bod yn anodd sefyll i fyny i unrhyw un.

Bydden nhw'n dweud wrthyf yn gyson bod pethau gwael yn mynd i ddigwydd, y byddai fy anwyliaid yn cael eu lladd, neu y byddwn yn cael fy ymosod arnaf.

Oedd y dudalen hon yn ddefnyddiol? Yes No Tell us more Tell us more

Tell us more

Why did you visit this page? *

For my own mental health
For someone else’s mental health
Academic/educational/professional reason
Other reason

What do you want to tell us about?

Praise – things we do well
Criticism – things we could do better
Errors, mistakes or broken links

Please give us your feedback:

Note:

Please don’t include personal details like your name or email address. If you do, data protection law means we’ll have to delete your comments.
Unfortunately we can’t reply to this. If you want a response from us, see our Contact us page.
If you are in crisis right now and want to talk to someone urgently then you could call Samaritans on 116 123 (freephone). Our pages on crisis services have more options.