Gwerthoedd yn Weithredu

Cyfranogiad pobl gyda phrofiad uniongyrchol o drallod meddwl

Mae Mind Cymru yn ceisio cyfrannu at drawsnewid dealltwriaeth o iechyd meddwl a lles, ac o agweddau tuag at, ac ymatebion i bobl sydd â phrofiad o drallod meddwl.

Yn ei hanfod credwn:

• Rhaid i ddysgu bywyd uniongyrchol pobl sydd â phrofiad o drallod meddwl lywio a dylanwadu ar bopeth a wna Mind Cymru, yn lleol ac yn genedlaethol

• Mae ein holl waith yn seiliedig ar gydnabod galluoedd gwirioneddol a photensial pobl sydd â phrofiad o drallod meddwl ac o'r cyfraniad a wnawn i gymdeithas

Mae Mind Cymru felly yn ymrwymedig i wneud cyfranogiad pobl sydd â phrofiad uniongyrchol o drallod meddwl yn ganolog i'n gwaith.

Rydym yn ceisio gwneud hynny trwy:

• Cael pobl sydd â phrofiad uniongyrchol yn weithwyr yn ein tîm - fel rheolwyr, staff cyflogedig a gwirfoddolwyr
• Ceisio cael barn pobl sydd â phrofiad uniongyrchol i yrru ein polisi, dylanwadu ar a newid gwaith
• Gweithio gyda chymdeithasau Mind lleol i ddatblygu ymagweddau sydd yn trin pobl gyda pharch ac sydd yn delio â galluoedd pobl yn ogystal â'u hanawsterau - eu hangen am hwyl yn ogystal ag am gefnogaeth
• Tynnu ar egni a chreadigrwydd pobl - boed o fewn ymgyrchoedd neu trwy weithgarwch fel gweithgarwch diwylliannol Mind Cymru mewn digwyddiadau fel yr Eisteddfod
• Galluogi pobl i newid ymagweddau trwy hyfforddiant a gwaith addysgol
• Ceisio darparu cyfleoedd i bobl â phrofiad uniongyrchol o drallod meddwl i ddod yn ymgyrchwyr, gweithredwyr ac arweinyddion cymunedol

Mae ein hymagwedd yn seiliedig ar y ddealltwriaeth ganlynol:

Rydym yn cydnabod ac yn parchu ein bod oll, fel bodau dynol yn profi trallod a phroblemau wrth fyw - er bod ffurf a graddau hyn yn amrywio'n fawr.

I rai ohonom mae ein trallod yn golygu ein bod yn ei chael yn anodd i ymdopi neu hyd yn oed i oroesi o ddydd i ddydd. I rai mae'n arwain at gysylltiad (bwriadol neu fel arall) gyda gwasanaethau iechyd meddwl fel defnyddwyr gwasanaeth. I'r rhai hynny ohonom sydd yn byw mewn tlodi ac yn wynebu gorthrwm a gwahaniaethu ( am ba bynnag reswm) mae'r perygl o brofi problemau iechyd meddwl mawr yn cynyddu'n enbyd.

I nifer ohonom o fewn ein cymdeithas mae ein trallod a'r modd yr ymatebir i hynny, yn cynnwys gwasanaethau iechyd meddwl, yn golygu ein bod weithiau yn cael ein camddeall, ein labelu, yn cael ein troi'n stereoteipiau, yn dioddef gwahaniaethu, yn cael ein tlodi ac yn cael ein heithrio mewn amrediad eang o ffyrdd.

Gall yr eithrio hwn o fewn ein cymunedau ein hunain gael effaith enfawr ar y modd yr ydym yn gweld ein hunain. Gall ein cred ynglŷn â'n gwerth, ein breuddwydion a'n dyheadau ar gyfer ein bywydau, ein synnwyr o'r hyn sydd gennym i'w gynnig i eraill, oll gael eu herydu.

Mae'r eithrio hwn hefyd yn golygu bod ein cymunedau yn cael eu hamddifadu yn aml o'n doniau, profiadau ac arbenigedd

Credwn bod y modd o fanteisio ar gyfleoedd a phrofiadau bywyd cadarnhaol yn ganolog i'n gallu i ymateb i'n trallod ac i allu cyflawni ein potensial.

Mae Mind Cymru felly wedi ymrwymo i hyrwyddo cyfleoedd ar gyfer cynhwysiad i bobl â phroblemau iechyd meddwl. Mae hyn ochr yn ochr gyda'n hymrwymiad i hyrwyddo cydraddoldeb, dathlu amrywiaeth a herio tlodi a gormes.